1. Sjónarmið eigenda Heimabæjar I á Hesteyri vegna breytinga á Heimabæ II.
   Sævar Gerisson og Guðmundur Jón Jónsson kynntu sjónarmið eigenda Heimabæjar I vegna breytinga á Heimabæ II. 
   Nefndinni hafði einnig borist skrifleg kynning frá eigendum Heimabæjar II.
   „Lagt fram til kynningar.“ 
2. Umsögn Hornstrandanefndar á teikningum vegna lagfæringa á Heimabæ II á Hesteyri.
   Eigendur Heimabæjar II sendu Ísafjarðarbæ umsókn um byggingarleyfi vegna breytinga og lagfæringa á húsinu. Var óskaði eftir umsögn Hornstrandanefndar vegna umrædda breytinga. Nefndin telur að erfitt sé að gefa umsögn um umrætt mál þar sem framkvæmdum er þegar lokið.
   „Nefndin gerir athugasemdir við umræddar teikningar. Telur nefndin að teikningin sé ekki í samræmi við ríkjandi byggingastíl á Hesteyri. Sérstaklega eru gerðar athugasemdir við útlit glugga, veltiglugga á þaki, breytingar á skorstein, hækkun þaks yfir viðbygginu og stækkun húss.“
   „Nefndin lýsir ánægju með endurbætur á húsum í friðlandinu þar sem húsin halda upprunalegu útliti en lýsir jafnframt áhyggjum af framkvæmdum sem unnar eru í friðlandinu án heimildar og telur að bragabót þurfi að vera þar á. Tryggja þarf að allar leyfiskyldar framkvæmdir í friðlandinu fari að settum lögum, s.s. breytingar á húsum, nýbyggingum o.fl.“
   „Jafnframt þarf að auka málshraða vegna afgreiðslu á framkvæmdabeiðnum og auðvelda fólki að sækja um. Til dæmis mætti gefa út að umsóknir þurfi að berast fyrir ákveðinn tíma að vetrinum ef svara sé vænst að vori, svo að hægt sé að hefjast handa um sumarið ef umsóknin er samþykkt.“
   „Einnig er spurning hvort Umhverfisstofnun ætti ekki að senda fulltrúum í Hornstrandanefnd strax í símbréfi, ef erindi berast sem varða nefndina svo að afgreiðsla tefjist sem minnst.“
3. Starfsemi liðsins sumars.
   Jón Björnsson, landvörður, fór yfir starfsemi liðsins sumars. Daníel Jakobsson, bæjarstjóri Ísafjarðarbæjar, greindi frá því að unnið væri að úrlausn á sorpmálum.
4. Önnur mál:
   1. Rætt um tíðni funda. 
      „Leggja ber áherslu á að flýta afgreiðslu mála og fjölga fundum ef fleiri erindi berast. Jafnframt geta einstakir fundarmenn geta óskað eftir fundi hvenær sem er, ekki síst ef mál liggur fyrir sem þarf skjótrar úrlausnar. “
   2. Rætt var um hvort halda ætti fund á Ísafirði.
   3. Bréf til landeigenda liggur nú fyrir til dreifingar.
   4. Vorfundur

Fundargerðin

1. Framkvæmdir á prestbústaðnum á Stað í Aðalvík.
   Rætt um endursmíði og breytingar á bíslagi (inngang) við Prestbústaðinn á Stað í Aðalvík.
   Nefndin gerir ekki athugasemd við framkvæmdina, enda ekki um teljandi breytingar á húsinu að ræða.
   
2. Upplýsingagögn til landeigenda/sumarhúsaeigenda 2011.
   Landverðir munu heimsækja öll hús í friðlandinu 2011, ræða við landeigendur og afhenda þeim möppu með helstu upplýsingum og leiðbeingum varðandi umgengni í friðlandinu.
   Nefndin bendir á að gögn sem þegar eru til mætti fylgja möppunni s.s. samningur um byggingaleyfi og auglýsing um friðlandið á Hornströndum. Jafnframt að setja inn upplýsingar um hlutverk Umhverfisstofnunar í friðlandinu, störf landvarða og annað sem fróðlegt væri að vita.
   
3. Jón Björnsson skýrði frá sumarstarfi 2011.
   Rætt var um ný leiðbeingaskilti, staðsetningu þeirra [Hesteyri, Sæbóli, Látrum, Fljótavík, Hlöðuvík, Höfn í Hornvík, Furufirði, Hrafnfirði og Veiðileysufirði] og umfang. Jafnframt um ferðir landvarða og helstu verkefni.
   Nefndin benti á nauðsyn þess að setja upp vegvísa á helstu aðkomuleiðum (Hesteyri, Sæból og Höfn), merkingu við staði þar sem sérstakrar aðgæslu er þörf (Posavogur) og nauðsyn þess að meta varhugaverðar gönguleiðir og lausn á þeim, ekki síst við forvaða. Jafnframt eru landverðir beðnir að huga að spottum sem nýttir eru sem handfestur víða í friðlandinu, s.s. við Tökin austan Hvarfnúps.
4. Önnur mála: Fjarskipti. Rætt um fjarskipti í friðlandinu og þróun þeirra.
   

Fundargerðin.

Aðalfundur LSG haldinn 25.05. 2009. 

Á síðasta aðalfundi LSG sem haldinn var 25. maí 2009 í húsi Nýherja hf., Borgartúni 37 voru eftirtaldir kjörnir til trúnaðarstarfa :

• Erling Ásgeirsson, formaður
• Sölvi Rúnar Sólbergsson, varaformaður
• Matthildur Guðmundsdóttir, ritari
• Ingvi Stígsson, gjaldkeri
• Magnús Reynir Guðmundsson, meðstjórnandi
• Guðmundur Halldórsson, varamaður
• Jósef H Vernharðsson, varamaður
• Sigríður Gunnarsdóttir, varamaður

• Ingibjörg Ásgeirsdóttir, endurskoðandi
• Kristján Guðmundsson, endurskoðandi
• Jón Borgarsson, varaendurskoðandi
• Anna Ásgeirsdóttir, varaendurskoðandi

Að loknum hefðbundnum aðalfundarstörfum var boðið upp á kaffiveitingar í boði félagsins.

1. Hornstrandanefnd

Hornstrandarnefnd heyrir undir Umhverfisstofnun.

Í Hornstrandanefnd sitja. Úr stjórn LSG Matthildur Guðmundsdóttir, Ingvi Stígsson og Erling Ásgeirsson. Frá Ísafjarðarbæ Halldór Halldórsson f.v. bæjarstjóra Ísafjarðarbæjar og Andrea Harðardóttir. Formaður nefndarinnar er Ólafur Arnar Jónsson deildarstjóri deildar náttúruvendar Umhverfisstofnunar og starfsmaður nefndarinnar er Jón Björnsson starfsmaður Umhverfisstofnunar og umsjónarmaður friðlandsins á Hornströndum. Á tímabilinu voru haldnir 2 fundir í Hornstrandanefnd.

Á fundinum 25. janúar 2010 var rætt um:

1. Ósk um álit Hornstrandanefndar á tveimur byggingarumsóknum að Látrum í Aðalvík. Óvissa er um eignarhald á landi beggja húsanna sem sótt er um. Matthildur lagði fram skriflega bókun, annars vegar varðandi eignarhald lands í landi Látraness í Aðalvík og hinsvegar um eignarhald á Urðarhúsi. 
   Nefndin samþykkir fyrir sitt leyti umræddar byggingar enda skerðir útlit þeirra, efnisval og staðsetning ekki ákvæði friðlýsingar.
   Nefndin bendir þó á að leyfi landeigenda eða lóðarhafa þarf að liggja fyrir, áður en til framkvæmda kemur á byggingarstað
2. Förgun sorps í friðlandinu
   Nefndinni barst ábending um að samhliða endurbygginu húss að Hesteyri hafi talsvert af efni og rusli verið brennt í grunni skammt ofan hússins. Nokkuð er um slíkar brennur í friðlandinu, jafnt vegna endurbóta eða nýbygginga húsa svo og venjulegt heimilissorp. Flestir húseigendur og nær allir gönguferðamenn taka þó rusl sitt með út úr firðlandinu. 
   Nefndin leggur til að Umhverfisstofnun sendi bréf til landeigenda og annarra sem málið varðar og kynni þær reglur sem lúta að frágangi sorps á svæðinu. Leggja þarf áherslu á að samkvæmt reglum friðlandsins er óheimilt að farga sorpi innan friðlandsins. 
3. Önnur mál
   Rætt um umferð vélknúinna ökutækja í friðlandinu. Ökutæki eru víða heimil til flutnings á farangri frá lendingu að húsum. Hinsvegar ber nokkuð á skemmtiakstri slíkra farartækja oft með tjóni á landi.
   Nefndin leggur til að Umhverfisstofnun sendi bréf til landeigenda og annarra sem málið varðar og kynni þær reglur sem lúta að akstir vélknúinna ökutækja í friðlandinu. Lagt er til að mál 2 og mál 4 verði í sama bréfi.

Á fundinum 14. september 2010 var rætt um:

1. Farið yfir gögn varðandi deiliskipulag í landi Geirmunda- og Atlastaða í Fljótavík. 
   Nefndi gerir ekki athugasemd við deiliskipulagið, enda séu framkvæmdir sem um ræðir samkvæmt aðalskipulagi. Nefndin áréttar að rask vegna framkvæmda verði haldið í lágmarki, frágangur við verkslok snyrtilegur, að framkvæmdir falli að landslagi og lágmarkað verði álag á náttúrun- og lífríki svæðisins
2.  Rætt um nýtt neyðarskýli sem setja á niður í Hlöðuvík og farið yfir gögn þar af lútandi. 
   Nefndin setur sig ekki á móti framkvæmdinni eða staðarvali, en lýsir þó yfir óánægju með vinnuferlið, þ.e. að skýlið var flutt í friðlandið áður en leyfi til niðursetningar lá fyrir svo og að útlit og efnisvali skýlisins felllur ekki að byggingarstíl svæðisins.
3.  Rætt um viðbyggingu við frístundahúsið Brekku í Fljótavík. 
   Nefndin gerir ekki athugasemdir við stækkunina. Bendir þó á að misræmi er í efnisvali milli teikninga og meðfylgjandi umsóknarbréfs
4.  Önnur mál
   1. Fyrirspurn frá landeigendafélagi um stöðu mála varðandi framkvæmdir við stækkun Heimabæjar II á Hesteyri.
      Nefndin felur Ólafi að skoða stöðu umrædds máls og kynna fyrir nefndarmönnum.
   2. Rætt um utanvegarakstur léttra hjóla (fjór- og sexhjól) í friðlandinu.
      Nefndin telur brýnt að átak verði gert til að sporna við akstri utan merktara slóða í friðlandinu, jafnt með kynningum til landeigenda, dreifibréfi, merkingum o.s.frv. 
   3. Rætt um ferðamenn, umgengni og stöðu mála sumarið 2010. Jón Björnsson gerði grein fyrir helstu niðurstöðum

2. Stjórnarfundir

Stjórn LSG hélt tvo stjórnarfundi á tímabilinu. Þann fyrri 29. október 2009 og þann síðari 15. október 2010. Á fundinum þann 29. okt. 2009 var rætt um heimasíðu fyrir félagið í kjölfar umræðu á síðasta aðalfundi. Ákveðið var að falast eftir léninu hornstrandir.is.

Rætt var um framkvæmdir á Heimabæ II, Sölvi fór yfir gang málsins. Sölvi og Matthildur sýndu myndir af vettvangi. Málið er í höndum bygginganefndar, og lögreglu á Ísafirði.

Fram kom á fundinum að Aðalskipulag fyrir friðlandið hafi verið samþykkt í bæjarstjórn Ísafjarðar og verið sent til ráðherra til staðfestingar. Formanni falið að svara bréfi Ísafjarðarbæjar þar að lútandi og tilkynna að LSG sé tilbúið í samstarf um um nánari stefnumörkun.

Vatnssalerni eru komin upp í Hornvík og stefnt að viðlíka framkvæmdum á Hesteyri.

Á fundinum 15. okt. 2010 var rætt um innheimtu félagsgjalda og að hún þurfi að vera skilvirkari. Ákveðið að sækja um kennitölu fyrir félagið þannig að unnt sé að semja við banka um að senda greiðsluseðla rafrænt t.d. inn í heimabanka félagsmanna.

Einnig var rætt um efni frá síðasta fundi Hornstrandanefndar þar sem sótt var um leyfi til að setja upp vatnsrafstöð í Fljótavík. Rætt um umsókn Sölva til að nota litla gröfu við lagfæringar í kring um hús sitt á Hesteyri, en umsókninni var hafnað. Ritari sótti um heimild til að kaupa nýja fundargerðabók og var það heimilað.

3. Heimasíða og samstarf við Átthagafélag Sléttuhrepps.

Formanni Erling Ásgeirssyni var boðið á aðalfund Átthagafélags Sléttuhrepps þar sem hann sagði frá stofnun og starfsemi Landeigendafélags Séttu- og Grunnavíkurhepps (LSG). Eins og áður hefur komið fram í skýrslu þessari kom fram tillaga sem var samþykkt á síðasta aðalfundi LSG um að koma upp heimasíðu fyrir félagið. Einnig kom fram sú ósk að falast yrði eftir léninu hornstrandir is. Hjónin Jóna Benediktsdóttir og Henry Bæringsson á Ísafirði tóku þessari málaleitan af höfðingsskap og eftirlétu félaginu lénið og eru þeim færðar bestu þakkir fyrir. Mál hafa nú skipast þannig að Átthagafélagið og Landeigendafélagið samnýta lénið hornstrandir.is og félögin eru síðan með sína lykkju á sameiginlegri forsíðu. Verður að segja að þetta er mjög viðeigandi og heppilegt fyrirkomulag sem gefur mikla möguleika í framtíðinni.

4. Skýrsla landvarða fyrir árið 2010

Umsjónarmaður friðlandsins og forstöðumaður Hornstrandastofu á Ísafirði Jón Björnsson mun vera á aðalfundinum þann 30. maí. Þar mun hann gera grein fyrir skýrslu sinni fyrir árið 2010. Hér eru settir inn nokkrir kaflar úr skýrslu Jóns til umhugsunar fyrir félagsmenn.

Hreinlætis- og sorpmál 

Ætlast er til að allir sem fara inn í friðlandið taki allt rusl með sér út aftur og skili á gámasvæði í komuhöfn. Flestir hlýða þeim fyrirmælum, en eitthvað ber þó á því að fólk vill brenna eða urða rusl í friðlandinu og eins er einhverju hent í kamra líkt og fyrr segir. Jafnvel eiga sumir það til að skilja rusl eftir við lendingarstaði báta í þeirri von að einhver fjarlægi það. Fremur er þá um landeigendur að ræða. Umræddir aðilar sýna þannig visst ábyrgðarleysi gagnvart eigin rusli. Þá er frárennsli frá rotþróm í óstandi frá stöku húsum, jafnvel er yfirfall þróa leitt út í næstu á eða læk og siturlagnakerfi er ófullnægjandi. Hvetja þarf til úrbóta og skoða umfang umrædds málaflokks. Fundað hefur verið með Ísafjarðarbæ um sorpmál á svæðinu, en þar sem ekki er tekið sérstakt gjald vegna þess hefur ekki verið farið út í kostnaðarsama sorphreinsun. Fremur er reynt að höfða til ábyrgðar þeirra sem ruslið eiga.

Vélknúin ökutæki innan friðlandsins

Áætla má að í friðlandinu séu milli tíu og tólf vélknúin ökutæki, flest þeirra fjórhjól. Tækin eru í eigu landeigenda og voru flest upphaflega flutt í friðlandið til þess að sjá um flutning farangurs frá lendingarstöðum í fjöru að húsum. Hinsvegar hafa einstaka landeigendur eða gestir þeirra einnig nýtt hjólin til almennra ferða um nærliggjandi svæði og þá oft utan slóða. Oftar en ekki er um veiðiferðir að ræða. Einstaka sinnum fara björgunarsveitir um á vélknúnum hjólum (sexhjólum) og nokkuð er um vélsleða- eða jeppaferðir á vetrum. 

Af og til sjást slóðir eftir slík tæki í grónu landi. Jafnframt eru í stöku tilfellum fleiri reglur brotnar s.s. akstur undir áhrifum áfengis og börn eða unglingar án leyfa á tækjum. Erfitt er að koma höndum á þetta, enda engin lögregla á svæðinu.

Höfða þarf til samvisku fólks vegna umræddra mála og halda úti kynningu um akstur vélknúinna ökutækja. Þá þarf að skilgreina betur akstur s.s. vélsleða í reglum svæðisins.

Veiðar 

Nokkuð er um að einstaklingar og hópar fari í friðlandið til veiða. Algengast er að sækja svartfugl undir björg og eins er nokkuð tekið af eggjum árlega, þó hefur eggjatínsla farið minnkandi hin síðari ár, enda jafnt erfitt um vik og hættulegt oft á tíðum. Svartfuglaveiði hefur hinsvegar aukist, jafnt með tilkomu handfærabáta svo og farþegabátar sem selja í veiðiferðir. Mest er skotið af fugli undan Ritnum.

Ávalt er eitthvað tekið af ref í friðlandinu þó hann sé alfriðaður. Ástæða veiðanna eru verðlaun sem greidd eru fyrir refaskott, en oft má ná nokkrum dýrum í einni ferð á svæðið, enda dýrin róleg og lítt vör um sig. Nokkuð er tekið í Hornvík, ekki síst við björgin og í Jökulfjörðum, þá helst Hesteyrarfirði og Veiðileysufirði. Erfitt er að meta umfang umræddra veiða, enda ólöglegar og lítt um frásagnir af þeim. Oftar má áætla veiðina út frá fjölda dýra á vissum stöðum og í góðum óðulum. Þannig hurfu óðalsdýr af nokkrum grenjum sumarið 2010. Af og til finnast skothylki á þekktum refaslóðum, sbr. Höfn, Hornvík. Hundar valda einnig óskunda á refaslóðum, en refir halda sig frekar frá stöðum þar sem margir hundar eru, sbr. Fljótavík. 

Eitthvað er skotið af gæs á haustin og smáræði af rjúpu. Nokkur silungaveiði er stunduð í friðlandinu, jafnt í net sem á stöng. Einstaka landeigendur hafa réttan hátt á varðandi netaveiðar og veiða samkvæmt reglu. Algengara er þó að menn sinni engum skyldum þar af lútandi. Enn eru til einstaklingar sem draga ósa og hrygningarhyli með netum, en slíkt er illa séð af öðrum landeigendum og fer fækkandi. Þá geta stundum stærri hópar yfirsetið ár, þ.e. ofveiða þær með mörgum stöngum.

Af og til heyrast sögur af skotveiðimönnum sem fara um eingöngu til þess að æfa skotfimi sína og sér til skemmtunar. Ábendingar hafa komið þess efnis frá ferðamönnum og húseigendum. Erfitt er um vik að eiga við slíka veiðimenn þar sem standa þarf þá að verki. Yfirleitt er lítið sem ekkert hirt af því sem skotið er og jafnvel alfriðaðar tegundir drepnar svo og tegundir utan veiðitímabila. Stórlega þarf að auka eftirlit með veiðum í friðlandinu. 

Flugsamgöngur

Nokkuð er um flugumferð í friðlandinu. Þrír lendingastaðir eru innan þess og nokkur umferð á tvo þeirra. Einn staðanna er aflagður flugvöllur að Látrum í Aðalvík, hinir eru utanvallar-lendingarstaðir í Hornvík og Fljótavík. Yfirleitt eru það landeigendur sem nýta sér flug á svæðið. Hinsvegar lenda af og til vélar í yfirflugi um svæðið. Nokkuð er um að flugvélar fljúgi nærri fuglabjörgum að sumri og er slíkt flug óheimilt. Talsvert af fugli er í framflugi við björgin og ávalt hætta á því að fugl lendi í skrúfu. Þá er ekki síður truflun á varpstöðum fugla. Fylgjast þarf með og skrá yfirflug, ekki síst lágflug. Einnig þarf að bregðast við ef mikil fjölgun verður á lendingu yfirflugsvéla á svæðinu. Slíkt veldur truflun og óánægju eða árekstrum við aðra gesti. Ná þarf samningum við landeigendur um að þeir lýsi lendingastaðina sem einkavelli.

Framkvæmdir í friðlandinu 2010

Nokkur hús eru í byggingu eða endurgerð í friðlandinu. Helstu framkvæmdir sumarsins 2010 eru í Fljótavík. Nokkuð hefur verið um það undanfarin ár að breytingar hafa verið gerðar á húsum í óleyfi og eru umræddir ferlar í skoðun hjá Ísafjarðarbæ í dag. Aðalskipulag var unnið fyrir svæðið árið 2008 og undirritað nýlega. Í skipulaginu kemur fram landnýtingaráætlun friðlandsins. Gert er ráð fyrir heimild til fjölgunar húsa. Nokkuð hefur borið á slæmri umgengni vegna endurgerða húsa. Þannig er gamalt járn og efni sem skipt hefur verið út, grafið og brennt t.d. í grunnum og jafnvel hent í sjóinn. 

Taka þarf á umræddum þætti og hvetja, ekki síst Ísafjarðarbæ og Hornstrandanefnd að setja frágang á fjarlægðu efni sem eitt skilyrða leyfisveitinga vegna endurgerða gamalla húsa. Leita þarf leiða til þess að ganga frá slíku efni sem er í friðlandinu í dag.

Niðurlag

Eins og áður hefur komið fram féll aðalfundur fyrir árið 2010 niður m.a. vegna mikilla anna hjá stjórnarmönnum , er beðist velvirðingar á því. Stjórnin starfaði áfram að þeim verkum sem lágu fyrir þannig að það er af og frá að hún hafi setið auðum höndum. Að vanda eru störf innan Hornstarandanefndar eitt helsta verkefni stjórnarinnar. Skráning félagsins á kennitölu og gerð heimasíðu eru þau verkefni sem standa upp úr á milli aðalfunda. Sérstaklega ber að þakka gjaldkera félagsins Ingva Stýgssyni fyrir hans framgöngu við að koma upp jafn glæsilegri heimasíðu og raun ber vitni um.

Mannabreytingar innan stjórnarinnar eru fremur fátíðar. Á síðasta aðalfundi tilkynnti Magnús Reynir Guðmundsson að hann gæfi ekki kost á sér til áframhaldandi stjórnarsetu eftir næsta aðalfund félagsins. Lét hann þess jafnframt getið að hann teldi Hörð Ingólfsson úr Fljótavík verðugan arftaka sinn. Það er mikill sjónarsviftir að Magnúsi Reyni hann hefur verið vara- og aðalmaður í stjórn LSG allt frá upphafi. Færir stjórnin honum bestu þakkir fyrir allt það sem hann hefur lagt að mörkum fyrir félagið. Stjórnin hefur ákveðið að fallast á tillögu Magnúsar og stinga upp á Herði Ingólfssyni til stjórnarkjörs á aðalfundinum þann 30. maí n.k. Að lokum færi ég stjórninni og sérstaklega Magnúsi mínar bestu þakkir fyrir samstarfið á undangengnu starfstímabili og félagsmönnum þakka ég auðsýnt traust og góð samskipti.

Reykjavík 30. maí 2011

Erling Ásgeirsson form. LSG  

Fundinn sátu 19 manns, þar af allir stjórnarmenn, Erling, Ingvi, Magnús Reynir, Matthildur og Sölvi Rúnar.

Fundarstjóri: Magnús Reynir Guðmundsson og fundarritari Matthildur Guðný Guðmundsdóttir.

Fundurinn hófst með kaffiveitingum m.a. rjómapönnukökum og öðru ljúffengu meðlæti.

Dagskrá:

1. Erling Ásgeirsson flutti skýrsla formanns sem síðar var dreift til allra fundarmanna. Hann baðst afsökunar fyrir hönd stjórnarinnar á því að aðalfundur síðasta árs þ.e. 2010 féll niður vegna óviðráðanlegra orsaka. Ein helsta nýjung í skýrslunni var að búið er að koma upp heimasíðu fyrir LSG sem Ingvi Stígsson hafði mestan veg af að vinna, en hjónin Jóna Benediktsdóttir og Henrý Bæringsson létu fálaginu eftir lén sem þau áttu í nafni „Hornstrandaferða“ Formaður flutti þeim sérstakar þakkir fyrir. Einnig kynnti Erling nokkur áhersluatriði úr nýútkominni skýrslu Jóns Björnssonar landvarðar og lagði áherslu á að stefna LSG væri virðing fyrir óspilltri náttúru og áhersla á að landeigendur hefðu frelsi til að viðhalda eignum sínum í friðlandinu og væru reiðubúnir til að veita upplýsinga um landið sitt og sögu frá fyrri tíð.
2. Ingvi Stígsson flutti skýrslu gjaldkera, en þær voru tvær, sín fyrir hvort árið 2009 og 2010. Skýrslunum var dreift til fundarmanna. Ingvi benti á að greiðsla félagsgjalda myndi skila sér betur í gegnum heimabanka ef menn hefðu þá tækni. En að sjálfsögðu yrði öðrum gefinn kostur á að greiða eins og verið hefði.
   Umræður um skýrslur formanns og gjaldkera.
   Ingva var sérstaklega þakkað fyrir vinnu við heimasíðu og fundarstjóri gat þess að góð samvinna væri milli Átthagafélaganna á Ísafirði og Reykjavík við LSG.
   Ingibjörg Júlíusdóttir þakkar heimasíðuna og líst vel á hana.
   Þorvarður bendir á að aðalfundir eigi ekki að falla niður og að þeir hafi aldrei fallið niður í sinni stjórnartíð. (Innskot fundarritara: Aðalfundir voru annað hvert ár í stjórnartíð Þorvarðar, samkvæmt þágildandi lögum!).
3.  Lagabreytingar: Ingvi útskýrði hvernig ósk um lagabreytingu er tilkomin. Sótt var um kennitölu fyrir LSG og þá gerði fyrirtækjaskrá athugasemd við lög LSG þar sem vantaði ákvæði um hverjir gætu slitið félaginu og hvað skyldi þá gert við eigur þess. Stjórnin leggur því til að 15. greininni verði bætt við lög félagsins og hljóði svo:
   Ákvörðun um slit félagsins verður tekin á aðalfundi félagsins og þarf samþykki 2/3 fundarmanna. Eignir félagsins við slit þess skulu renna til bygginga- og viðhaldssjóða átthagafélaga í Sléttu- og Grunnavíkurhreppum hinum fornu með það að markmiði að viðhalda húsum, kirkjum og kirkjugörðum í þeirra eigu eða umsjá.
   Þessi lagagrein var samþykkt samhljóða.
4. Stjórnarkjör: Magnús Reynir tilkynnti á síðasta aðalfundi að hann óskaði eftir að hætta stjórnarstörfum í félagi LSG, en hann hafði starfað í stjórn félagsins frá stofnun þess 1973. Hann stakk þá upp á að Hörður Ingólfsson frá Fljótavík kæmi í stjórnina í sinn stað.
   Hörður hefur gefið kost á sér og einnig hefur Jósef Vernharðsson boðið sig fram. Hörður var kosinn með öllum greiddum atkvæðum í aðalstjórnina og Jósef í varastjórn eins og áður.
5. Skoðunarmenn voru endurkjörnir, en þeir eru Anna og Ingibjörg Ásgeirsdætur, Kristján Guðmundsson og Jón Borgarsson. Jón og Anna eru varamenn.
6. Árgjald félagsins var samþykkt óbreytt, kr. 1000.-
7. Önnur mál:

• Jón Björnsson landvörður sagði að Jónas Gunnlaugsson væri ráðinn landvörður í 7 – 8 vikur og ætti að vera mest á Hesteyri og í Aðalvík, en Jón mest í Hornvík en annars munu þeir skiptast á að sinna öllu svæðinu. Skýrslu landvarðar frá 2010 verður dreift til fundargesta síðar en þar kemur fram að ferðamönnum fjölgar inn á svæðið og í skýrslunni eru ýmis áhersluatriði um kröfur til ferðamanna um viðeigandi útbúnað svo sem tæknilegri þekkingu á GPS eða áttavita, góðum skjólklæðnaði skóm og tjöldum. Vegna fjárskorts mun dragast að sett verði upp vatnssalerni á Hesteyri en unnið verður við að lagfæra göngustíga eftir því sem hægt er. Göngustígur frá Hornvík til Rekavíkur er erfiður og lagfæring á honum mun kosta mikið þar sem sjórinn er að brjóta landið upp að klettum. Einnig getur göngustígur milli Kjaransvíkur og Hlöðuvíkur orðið erfiður og leiðin við Posavog í Aðalvík. Á öllum þessum stöðum þarf miklar framkvæmdir sem ekki verður ráðist í að sinni.
  Vegna erfiðs aðgengis að friðlandinu er ekki stefnt að þjóðgarði þar. Neyðarlínan setur e.t.v. upp Tetrakerfi .
  Landvörður óskar eftir að Ísafjarðarbær hafi ruslagáma við höfnina.
  Verið er að vinna við endurbætur á korti yfir svæðið, þar sem reynt verður að hafa rétt örnefni samkvæmt þekkingu heimamanna. Kortunum á svo að dreifa til landeigenda og ferðamanna og Landmælinga.

• Þorvarður Jónsson flutti greinagóða skýrslu um rétt sjávarjarða, en hann var fyrir 10 árum kjörinn til að fylgjast með því máli fyrir hönd LSG. Skýrslan fylgir með fundargerðinni. Hann sagði frá aðdraganda að því að stofnuð voru samtök eigenda sjávarjarða SES og að leitað var eftir samvinnu við LSG .
• Matthildur þakkaði Magnúsi Reyni fyrir vel unnin störf í stjórn LSG í 38 ár.
• Jón Freyr spyr um möguleika á að sérfélög innan landeigendafélagsins geti tengst heimasíðunni, svo sem félag Látramanna, Fljótamanna eða Hesteyringa.
• Ólafur Stefánsson bendir á að það kosti peninga að halda úti heimasíðu og hvort ekki komi til greina að selja auglýsingar inn á síðuna frá aðilum sem séu að flytja farþega inn í friðlandið eða frá einhverjum öðrum sem eigi erindi við okkur.
• Formaður segir að allar góðar ábendingar og fyrirspurnir verði teknar til athugunar.
• Petrína Rósa Ágústsdóttir bendir á að varðandi greiðslu félagsgjalds hafi ekki allir heimabanka.
• Formaður tók undir orð Matthildar með þakkir til Magnúsar Reynis fyrir farsæl stjórnarstörf og þakkaði fundarmönnum það traust að endurkjósa þá stjórnarmenn sem gáfu kost á sér til setu áfram og sleit fundi kl. 19.30

Matthildur Guðný Guðmundsdóttir fundarritari.

SES var stofnað 5. júlí 2001. Formaður er Ómar Antonsson eigandi sjávarjarðarinnar Horn í Nesjum, Hornafirði. Með honum í stjórn SES voru Björn Erlendsson, eigandi sjávarjarðanna Eiði á Langanesi og Selskarðs á Álftanesi og Sigurður Filippusson, Dvergasteini, Seyðisfirði.

Björn Erlendsson hafði samband við Matthildi Guðmundsdóttur skömmu fyrir jól 2000 og kynnti fyrir henni áhuga bænda sjávarjarða á að skoða rétt sinn til útræðis. Matthildur kynnti stjórn LSG málið í febrúar 2001. Fjallað var um þetta mál á aðalfundi LSG 6. júní 2001 undir lið 6. “Endurheimt á útræðisrétti jarða í fyrrum Sléttu- og Grunnavíkurhreppi.”

Á stjórnarfundi LSG 20. júní 2001 var Þorvarði Jónssyni, fyrrverandi formanni LSG falið SES verkefnið af stjórn LSG. Þorvarður gekk því í SES fyrir sjávarjörðina Látrar í Aðalvík í ársbyrjun 2002 og er þetta ár því tíunda ár hans í SES. Þorvarður hefur flutt skýrslur um gang mála hjá SES á öllum aðalfundum LSG á þessu tímabili.

Aðalbaráttumál SES var að fá þann rétt aftur sem felst í netlögunum, en hann var afnuminn með kvótalögunum. Netlögin eru skráð bæði í Grágás og Jónsbók, sem er frá 1281. Aðalákvæði netlaga er einkaréttur sjávarjarða á 60 föðmum = 115 metrum á sjó frá stórstraumsfjörumáli.

Eftir að SES hafði reynt án árangurs að semja við ríkisstjórnina um málið var samþykkt á aðalfundi SES í nóvember 2003 að stefna ríkinu. Í febrúar 2004 var samið við Ragnar Aðalsteinsson, hrl. að taka málið að sér. Viðræðum Ragnars við sjávarútvegsráðherra var hafnað og lagði hann fram kæru í Héraðsdómi Reykjavíkur 14. desember 2006. Kæran var fyrir hönd formanns SES Ómars Antonssonar fyrir sjávarjörð hans Horn í Nesjum, Hornafirði um viðurkenningu á rétti hans yfir netlögum jarðarinnar.

• 02.10.2007: Héraðsdómur Reykjavíkur vísar máli Ómars gegn íslenska ríkinu frá.
• 15.10.2007: Frávísunarúrskurður Héraðsdóms Reykjavíkur kærður til Hæstaréttar.
• 31.10.2007: Hæstréttur vísar málinu frá dómi.

Ragnar Aðalsteinsson, hrl. var með annað mál út af netlögum í gangi á sama tíma. Það var grásleppumál Björns Guðna Guðjónssonar (BGG). BGG veiddi grásleppu í apríl – maí 2003 samkvæmt netlögum jarðarinnar Bjarnarness í Kaldraðarneshreppi (í nágrenni Drangsness).

• 08.03.2004: Sýslumaðurinn í Hólmavík kærir BGG fyrir brot á fiskveiðilögum.
• 28.09.2004: BGG dæmdur sekur í Héraðsdómi Vestfjarða.
• 28.04.2005: Hæstiréttur staðfestir héraðsdóm.
• 27.10.2005: Málinu vísað til Mannréttindadómstóls Evrópu (European court of human rights, ECHR) þar sem það var samþykkt til efnislegrar meðferðar. Aðalfundur SES samþykkti að styrkja þessi málaferli.
• 15.02.2009: ECHR dæmdi kæruna (illa grundaða og) ótæka til meðferðar.

Í umfjöllun Mannréttindadómstóls Evrópu segir: “Ennfremur er það niðurstaða dómsins að réttur kæranda til þess að stunda fiskveiðar í netlögum úti fyrir sjávarjörðinni sem um ræðir hafi myndað eign í skilningi 1. gr. samningsviðauka 1.”

• 24.10.2007: Mannréttindanefnd Sameinuðu þjóðanna úrskurðaði að íslenskum stjórnvöldum bæri að endurskoða fiskveiðistjórnunarkerfið og greiða tveimur sjómönnum bætur fyrir að hafa ekki fengið úthlutað kvóta (mál 1306/2004). Íslenska ríkið er lagalega bundið niðurstöðum þessa dóms.

Ríkisstjórnin skipaði starfshóp til þess að endurskoða lög um stjórn fiskveiða og var Guðbjartur Hannesson alþm. formaður hópsins. SES átti engan fulltrúa í starfshópnum og fór stjórn SES fram á fund með Guðbjarti um málið, sem haldinn var 23. nóvember 2009. Guðbjartur tók undir að eigendur sjávarjarða ættu rétt á að fá fulltrúa í starfshópnum en að sjávarútvegsráðherra yrði að taka ákvörðun um það. Guðbjartur taldi mikilvægt að stofnað yrði til nefndar til að komast að raun um hver réttindi sjávarjarða væru og skilgreina þau. Formaður SES bað margoft um fund með sjávarútvegsráðherra um þetta mál og var hann loks haldinn 20. janúar 2010 og þar samþykkti hann að SES fengi fulltrúa í starfshópinn og tók ritari stjórnar SES það að sér.

Stjórn SES fékk fund með Timo Summa, sendiherra Evrópska efnahagssvæðisins 3. febrúar 2010 og upplýstu hann um að íslensk stjórnvöld hefðu hvorki umboð né heimildir til að ráðstafa, með nokkrum hætti, eignarrétti sjávarjarða í sjávarauðlindinni.

• 03.03.2011: Vigdís Hauksdóttir, alþm. sendi sjávarúvegsráðherra Jóni Bjarnasyni eftirfarandi fyrirspurnir:
  1. Er útræðisréttur sjávarjarða og eignarréttur innan netlaga tryggður í samningaviðræðum við Evrópusambandið?
  2.  Verður útræðisréttur sjávarjarða virtur og staðfestur við þá endurskoðun laga um stjórn fiskveiða sem núverandi ríkisstjórn hyggst ráðast í?
     Verða eignaréttindi sjávarjarða innan netlaga tryggð við endurskoðunina?

Í svari Jóns Bjarnasonar er málið reifað, farið yfir skýrslu starfshópsins um endurskoðun laga um stjórn fiskveiða. „Ráðherra hefur ekki skipað sérstaka nefnd samkvæmt ábendingum meiri hluta starfshópsins og að beiðni SES. Að því leyti sem endurskoðunin snertir skýrlega málefni eigenda sjávarjarða verður engu að síður leitast við að hlýða á sjónarmið þeirra og taka tillit til þeirra. Með vísan til framangreinds getur ráðuneytið ekki að svo stöddu gefið frekari svör um afstöðu til sjónarmiða þeirra.“

• 29.04.2011: Stjórn SES sendi bréf til sjávarútvegsráðherra með tillögu að lausn málsins við setningu nýrra laga um stjórn fiskveiða. Lagt er til á þessu stigi, að allar sjávarjarðir fengju heimild til að gera út einn bát (12 metra langan að hámarki) frá hverri sjávarjörð á tímabilinu frá byrjun apríl til loka september. Að fjöldi manna á bát megi ekki vera fleiri en tveir. Að veiðarfæri skuli vera krókar. Handfæri miðist við tvær rúllur á mann og lína við 3200 króka. Afla skal landa á viðurkennda vigt. Að 2% af aflaverðmæti renni til SES.

Þorvarður Jónsson

1. Skýrsla stjórnar.
2. Lagðir fram endurskoðaðir ársreikningar.
3. Lagabreytingar.
4. Stjórnarkjör.
5. Kjör tveggja endurskoðenda til 2ja ára í senn og tveggja til vara.
6. Tekin ákvörðun um árgjald til félagsins.
7. Önnur mál.

Tillaga til breytinga á lögum félagsins, ný 15. grein:

Ákvörðun um slit félagsins verður tekin á aðalfundi félagsins og þarf samþykki ⅔ fundarmanna. Eignir félagsins við slit þess skulu renna til bygginga- og viðhaldssjóða átthagafélaga í Sléttu- og Grunnavíkurhreppum hinum fornu með það að markmiði að viðhalda húsum, kirkjum og kirkjugörðum i þeirra eigu eða umsjá.

Landeigendafélagið er í samstarfi með Átthagafélögum Sléttuhrepps í Reykjavík og á Ísafirði um vefsvæði. En átthagafélögin nota veffangið www.slettuhreppur.is til að vísa á sama vef.

Á vefnum eru upplýsingar um félagið, s.s. stjórnarmenn, lög félagins, fréttir frá félaginu. Þá er skráningarsíða fyrir nýja félagsmenn og hægt er að senda stjórn fyrirspurn. Þarna eru einnig upplýsingar um Hornstrandanefnd sem er ráðgjafanefnd um málefni friðlandsins, en í henni eiga sæti fulltrúar Landeigendafélagins, Ísafjarðarbæjar og Umhverfisstofnunar.

1. Aðalfundur LSG haldinn 13.11. 2008. (sjá meðf. fundargerð)

Á síðasta aðalfundi LSG sem haldinn var 13. nóvember 2008 í húsi Nýherja hf., Borgartúni 37 voru eftirtaldir kjörnir til trúnaðarstarfa :

• Erling Ásgeirsson, formaður
• Sölvi Rúnar Sólbergsson, varaformaður
• Matthildur Guðmundsdóttir, ritari
• Guðríður H Benediktsdóttir, gjaldkeri
• Magnús Reynir Guðmundsson, meðstjónandi
• Guðmundur Halldórsson. varamaður
• Jósef H Vernharðsson, varamaður
• Sigríður Gunnarsdóttir, varamaður

• Ingibjörg Ásgeirsdóttir, endurskoðandi
• Kristján Guðmundsson, endurskoðandi

• Jón Borgarsson, varaendurskoðandi
• Anna Ásgeirsdóttir, varaendurskoðandi

Að loknum hefðbundnum aðalfundarstörfum var boðið upp á kaffiveitingar í boði

félagsins.

1. Hornstrandanefnd

Hornstrandarnefnd heyrir undir Umhverfisstofnun.

Í Hornstrandanefnd sitja. Úr stjórn LSG Matthildur Guðmundsdóttir,  Guðríður Benediktsdóttir, Erling Ásgeirsson. Frá Ísafjarðarbæ  Halldór Halldórsson bæjarstjóri Ísafjarðarbæjar og Andrea Harðardóttir fulltrúi Ísafjarðarbæjar Formaður nefndarinnar er Ólafur Arnar Jónsson deildarstjóri deildar nátturuvendar Umhverfisstofnunar og starfsmaður nefndarinnar er Jón Björnsson starfsmaður umhverfisstofnunar og umsjónarmaður friðlandsins á Hornströndum.

  Erindi til Hornstrandanefndar

Nefndinni bárust tvö erindi til umsagnar. Annað varðar byggingu sumarhúss á Geirmundarstöðum í Fljótavík. Nefndin gaf erindinu jákvæða umsögn að uppfylltum venjubundnum skilyrðum. Hitt var um endurnýjun hluta lagna við Hornbjargsvita. Á fundi nefndarinnar 25. febrúar s.l. kynnti Jón Björnsson væntanleg störf  á vegum landvarðar á komandi sumri.

  Stjórnarfundur 

Tveir stjórnarfundir voru haldnir á tímabilinu 9. febrúar og 19. maí. Á fundinn 9. febrúar  komu landeigendur og hagsmunaaðilar úr Fljótavík og lýstu óánægju sinni með drög að Aðalskipulagi fyrir Ísafjarðarbæ 2008-2020. Þeir voru Hörður Ingólfsson og Atli Ingvarsson Atlastöðum, Edward Finnsson Tungu og Glúmstöðum, Ásmundur Guðnason Geirmundarstöðum. Gestir gerðu stjórn LSG grein fyrir sjónarmiðum sínum og voru þau innlegg í bréf formanns til formanns Umhverfisnefndar Ísafjarðarbæjar dags. 16 mars 2009.   

2. Aðalskipulag Ísafjarðarbæjar 2008-2020.

Stjórn LSG skipaði  2 aðila, á árinu 2007, til að taka þátt í undirbúningi við gerð Aðalskipulags Ísafjarðarbæjar 2008 – 2020. Stjórnin tilnefndi úr sínum röðum þá Sölva Sólbergsson og Erling Ásgeirsson. Starfa þeir í Skipulagshópi Hornstrandasvæðis. Stjórnin  lagði verulega vinnu í sína álitsgerð skrifaði m.a. á sinni tíð bréf til allara félagsmanna þar sem gerð var grein fyrir málinu og óskað eftir tillögum og athugasemdum.

Þeir Sölvi og Erling skiptu með sér verkum þannig að Sölvi sótti fundi á Ísafirði og Erling vann að undirbúningi fyrir sunnan. Haldnir voru  samtals 11 vinnufundir á Ísafirði sem Sölvi sótti alla. Loka fundur hópsins var síðan haldinn 6. maí s.l. og kom þar fram að bæjarstjórn Ísafjarðar hefur afgreitt skipulagið í núverandi mynd og liggur það hjá Skipulagsstofnun til afgreiðslu. Kemur það þá augljóslega í hlut stjórnar LSG að senda inn athugasemdir vegna skipulagsins í samræmi við þau sjónarmið er ríkja innan stjórnarinnar.

                                                                                                          Garðabæ 16.mars 2009,

Svanlaug Guðnadóttir

Form. umhverfisnefndar

Ísafjarðarbæjar.

 

Varðar: Drög að Aðalskipulagi Ísafjarðarbæjar 2008-2020. Athugasemd LSG o.fl.

 

Rétt er í upphafi að gera örlitla grein fyrir Landeigendafélagi Sléttu- og Grunnavíkurhrepps (LSG.)

Félagið er stofnað 10. mars 1973 í þeim tilgangi að gæta hagsmuna landeigenda innan friðlandsins.

Þegar í upphafi tókst mjög gott samstarf milli félagsins og þeirra yfirvalda er höfðu með friðlandið að gera, Náttúruverndar ríkisins , síðar Náttúrufræðistofnunar og enn  síðar Umhverfisstofnunar og Ísafjarðarbær. Þess má glöggt sjá merki í auglýsingum um friðlandið í Stjtíð B,nr. 366/1975 og nr. 332/1985, sem undirritaðar voru af þáverandi menntamálaráðherrum  að löggjafinn ætlar LSG mikilvægt hlutverk í málefnum friðlandsins, en þar segir í 9. Grein.“ Umhverfisstofnun og LSG tilnefna hvort um sig þrjá menn í samstarfsnefnd um málefni friðlandsins“. Þetta ákvæði í auglýsingu um friðlandið liggur síðan til grundvallar við stofnun Hornstrandanefndar  sem fer með málefni friðlandsins innan Umhverfisstofnunar. Þar  eiga sæti þrír aðilar frá LSG tveir frá Ísafjarðarbæ og einn frá Umhverfisstofnun sem er oddamaður. Ég tel að það megi með fullri sanngirni segja að stjórn LSG hafi rækt  hlutverk sitt innan Hornstrandanefndar  með miklum ágætum frá fyrstu tíð. Núgildandi vinnureglur varðandi byggingarleyfi í friðlandinu á Hornströndum eru t.d. gerðar og samþykktar að undirlagi félagsins.  Samkomulag þar um, milli Umhverfisstofnunar, Ísafjarðarbæjar og Landeigandafélags Sléttu –og Grunnavíkurhrepps gjört í mars 2004 er almennt álitið sanngjarnt og eðlilegt af öllum þorra landeigenda og kom þeim málum sem það nær til í fastari skorður en áður hafði verið.

 

Stjórn LSG hefur fjallað um drög að Aðalskipulagi  Ísafjarðarbæjar 2008-2020 á sínum vettvangi  að undanförnu. Fyrir hönd stjórnarinnar hafa varaform. LSG Sölvi Sólbergsson og formaður LSG Erling Ásgeirsson einkum séð um samskipti við skipulagsráðgjafa. Sölvi hefur setið alla fundi í stýrihópi verkefnisins á Ísafirði. Fjallað hefur verið um málið á tveimur aðalfundum LSG og kynningarbréf var sent til allra félaga þar sem óskað var eftir ábendingum og hugmyndum um skipulagsmál í friðlandinu.

Stjórn LSG sendi  síðan inn ýtarleg svör og hugmyndir við upphaf samráðsferilsins sem hefur verið leiðarljós í áframhaldandi samráðsvinnu af hálfu félagsins.

 

Rétt er að að taka fram að samráðsferlið og öll vinna við aðalskipulagið er að mati stjórnar  LSG til mikillar fyrirmyndar og vandaðra vinnubragða og fagmennsku gætt í hvívetna en að sjálfsögðu koma upp álitamál í jafn viðamiklu verkefni og hér um ræðir. Hvað varðar friðlandið eru það einkum þrjú atriði sem stjórn LSG leggur áherslu á.

 

 

1. Stjórn LSG vill árétta að samkomulag um byggingarleyfi í friðlandinu frá mars 2004 verði áfram í gildi eftir gildistöku Aðalskipulags Ísafjarðarbæjar 2008-2020. Þessar reglur voru byggðar á auglýsingu nr. 332/1985 um friðland á Hornströndum, lögum nr. 44/1999 um náttúruvernd og skipulags- og byggingarlögum nr. 73/1997. 
   Með þessu samkomulagi var tryggð ákveðin sátt meðal landeigenda. Reglurnar  tryggja jafnframt  aðkomu staðkunnugra að málum.
   Stjórnin leggur áherslu á að núgildandi reglur hafa reynst mjög vel og því  engin ástæða til að setja fram fjöldatakmarkanir sem geti haft þau áhrif að fólk vilji flýta sér að nýta þann kvóta sem yrði leyfilegur á hverjum stað.
2. Í drögum að aðalskipulagi í Viðauka B á bls. 158 eru hugmyndir  um  hámarksfjölda húsa í Fljótavík, á Atlastöðum og Geirmundarstöðum  sem teljast mjög íþyngjandi fyrir landeigendur í Fljótavík og ganga þvert á yfirlýstan vilja um að eiga gott og náið samráð við landeigendur . Taka verður tillit til þess að þegar hafa verið gefin út byggingarleyfi fyrir þeim tveimur húsum sem áformað er að leyfa til viðbótar við núverandi byggð í Fljótavík. Gert  er ráð fyrir að þau rísi nú á sumri komandi. Það verður því að teljast afar óheppilegt að aðrir eigendur jarðanna geti ekki í framtíðinni átt möguleika á að byggja á eignarlandi sínu. Ósk stjórnar LSG er að  tillögur að hámarksfjölda húsa verði endurskoðaðar í þeim tilgangi að skapa sátt um aðalskipulagsdrögin.  
   Einnig leggur stjórn LSG til að landeiganda í Tungu og Glúmsstöðum í Fljótavík verði gert mögulegt að flytja byggingarrétt frá Glúmstöðum í land Tungu.
   Því til rökstuðnings bendir stjórn LSG á að það getur verið til hagsbóta fyrir umhverfisvernd á svæðinu að flytja mögulega byggð á Glúmstöðum norður fyrir vatnið í land Tungu.
3. Stjórn LSG telur mikilvægt að skipulagsyfirvöld Ísafjarðarbæjar komi á stöðluðum vinnubrögðum við gerð deiliskipulags á þeim svæðum innan friðlandsins sem ekki hafa þegar samþykkt deiliskipulag. Stjórn LSG lýsir sig reiðubúna til samstarfs í þessum efnum.

 

Stjórn LSG er  þeirrar skoðunar að fram komin drög að Aðalskipulagi Ísafjarðarbæjar 2008-2020  séu unnin af vandvirkni og komi til  með að verða góður rammi og leiðarljós fyrir blómlega byggð og gróskumikið mannlíf  á skipulagstímabilinu. Stjórnin deilir einnig þeirri skoðun að best sé að sætta mismunandi sjónarmið áður en til formlegrar auglýsingar kemur og eru ofangreindar  ábendingar settar fram  í þeim tilgangi. Það er jafnframt  eindregin ósk stjórnar LSG að fullt tillit verði tekið til framkominna hugmynda félagsins. Fulltrúum LSG í samráðshópnum mun verða falið að fylgja málinu eftir fyrir hönd félagsins.

 

Með vinsemd og virðingu,

Fyrir hönd Landeigendafélags Sléttu- og Grunnavíkurhrepps.

Erling Ásgeirsson formaður,

Lynghæð 1

 210 Garðabær.

erling@sense.is

 

 Samrit:

Halldór Halldórsson bæjarstjóri  Ísafjarðarbæ.

Niðurlag.

Nýliðið starfsár hefur verið óvenju stutt þar sem aðalfundur 2008 var haldinn13. nóvember 2008 af ástæðum sem voru skýrðar á sinni tíð. Vinna að undirbúningi að Aðalskipulagi Ísafjarðar 2008 – 2020 hefur verið fyrirferðarmest. Nú sér fyrir endann á því verkefni.

Starfið innan Hornstrandanefndarinnar er eitt aðalverkefnið stjórnarinnar. Tvö mál  komu til kasta nefndarinnar á starfsárinu. Stjórn LSG hefur nú starfað óbreytt í 5 ár.  Guðríður Benediktsdóttir sem verið hefur gjaldkeri í stjórninni s.l. 5 ár hefur óskað eftir að láta af störfum og mun nýr aðili verða kosinn í hennar stað á þessum aðalfundi. Við sem eftir sitjum í stjórninni þökkum  Guðríði fyrir samstarfið og vel unnin störf í þágu félagsins.

Reykjavík 25. maí 2009

Erling Ásgeirsson form. LSG